أسهل طريقة لعمل المكرونة بالبشاميل دايت قليلة الدسم

أسهل طريقة لعمل المكرونة بالبشاميل دايت قليلة الدسم

ايوة بالظبط زي ما قريتي كدا هتاكلي مكرونة بالبشاميل سهلة للدايت بطريقة بسيطة وجميلة وهتحافظي علي وزنك . 

بدون سعرات حرارية زيادة او دهون كتير ونضطر نعمل تمارين ياما علشان نحرق كل دا .

ملحوظة صغيرة جدا .

"الدايت مش لازم تحرم نفسك من كل حاجة لا تقدري تاكلي أي حاجة بس بمكونات صحية ودهون قليلة  زي مثلا نقلل السمنة والزيوت وهكذا "

 فانا انهاردة هقدملك طريقة مكرونة بالبشاميل باللحمة المفرومة في الفرن بأبسط وأسهل طريقة خالص.

تابعي معايا المقادير ......

مقادير المكرونة البشاميل الدايت قليلة الدسم : 

1- 500 جرام مكرونة ( نصف كيلو )

2- 3 كوبايات لبن خالي الدسم 

3- 500 جرام لحم مفروم خالية من الدهون  ( نصف كيلو يستحسن تفرميها في البيت علشان تضمني ان مفيش دهون )

4- 3 ملاعق دقيق اسمر 

5- ملعقة كبيرة صلصة

6- 2 حبة فلفل اخضر رومي متوسطين الحجم

7- ربع ملعقة فلفل اسود 

8 - نص ملعقة ملح 

9 - 1 حبة بصل أبيض متوسطة الحجم 

10- ملعقة زبدة

11- ملعقة زيت زيتون

خلصنا المقادير  يالا بينا نخش علي المرحلة الثانية طريقة التحضير.......

طريقة تحضير المكرونة البشاميل الدايت قليلة الدسم : 

1- هنغلي ماية ونحط فيها المكرونة  وهنضيف نص ملعقة ملح ونفضل نقلب علشان خاطر المكرونة متلزقش لمدة 5 دقايق لان محتاجينها نص سوا وبعد كدا نطلعها في المصفاة ونفتح عليها الماية علشان تتخلص من النشا الزيادة .

2- هنبشر البصلة ونشوحها في طاسة ونضيف عليها اللحمة المفرومة ونضيف عليها نص ملعقة ملح وربع ملعقة فلفل اسود مع نص ملعقة الزبدة والفلفل الاخضر الرومي المتقطع ومعلقة الصلصة ونقلب لغاية ما اللحمة تتشوح .

3- هنحضر صوص بشاميل دايت عن طريق نجيب طبق نحط فيه اللبن الخالي من الدسم من غير مايتسخن ونضيف معاه الدقيق الاسمر ونص ملعقة زبدة ونقلبو لغاية ما يتخلطو مع بعض وبعد كدا نولع عليه النار لغاية ما نوصل للسمك والكثافة المطلوبة .

4- بعد كدا هنجيب صنية ثم ندهنها معلقة زيت زيتون ثم معلقة بشاميل وبعد كدا هنضيف شوية مكرونة (نص الكمية تقريبا الي عندي) بعد كدا هضيف اللحمة المفرومة المعصجة وبعد كدا هضيف باقي كمية المكرونة وبعد كدا هضيف صوص بشاميل دايت . 

5- هنضيف مكرونة بالبشاميل في الميكرويف لمدة 25 دقيقة وبعد كدا اولع الشواية لمدة 5 دقايق علشان وشها يحمر .

 كدا خلصنا .

طبعا في وصفة مكرونة بشاميل calories قليلة جدا وممكن نستغني عن الزبدة لو مش حابين لتخفيف calories اكتر.

وبكدا نكون خلصنا وصفتنا انهاردة طريقة عمل المكرونة بالبشاميل تحفة بالطريقة المصرية في الفرن لو عجبتك الوصفة وعايزة وصفات اكتر تقدر تنضم لجروبنا   من هنا .

ولو عندك أي استفسار او اي ملحوظة تقدري تكتبي في الكومنتات .